طبعا انت ممكن تكون فاكر إن ده مقال زي أي مقال بيتكلم عن ال (positioning) قريته ف أي حته قبل كده!
بس لا!
لإنك بعد قراية المقال ده هتخرج بمعلومات، ومفهوم.وتفكير جديد عن ال (brand positioning)،وأفكار كتيييييرة تانية ف التسويق مينفعش يعدي المقال ده من عليك مرور الكرام المحسنين.
فكمل قراية بقا،وكفاية مقدمات حماسية!😁
خلينا الأول بس نناقش معني مصطلح (البوزيشنينج) بالمختصر المفيد،وبعد كده ندخل ف الجد.😃
إيه هو ال ( brand positioning)؟
خلينا الأول نختار ترجمة حلوة للكلمة ده بالعربي بدل كلمة (تموضع العلامة التجارية)!
وهنتفق مع بعض ع كلمة ( نقطة تميز البراند).
تمام يا زميكس!
تمام!😃
(نقطة تمسز البراند) ببساطة!
هو مصطلح ظهر بعد الحرب العالمية الثانية.
وهو جزء من ال (marketing strategy) اللي بيحطها أي بيزنس.
زيها زي ال (🎯segmentation🔪/targeting). وتقدر تقول إن التلاتة تواءم ملتصقة،بيتعملوا ورا بعض.
تك تك تك.
١) segmentation
٢) targeting
٣) positioning
اللي بنسميهم ال (STP).
والمفهوم ده عبارة عن:
إن فيه حاجة كده بتلمع ف منتجك/خدمتك بتميزك عن أي منافس تاني ليك ف السوق؛وبالتالي أول ما أي حد يجيب سيرة منتجك/خدمتك/البراند بتاعك من بعيد أو قريب؛تلاقي ف ثانية إلا ثانية،الناس جه ف بالها الحاجة اللي منتجك/خدمتك بتتميز بيها.
وقالت ايوه ده أحسن/ أسرع/...شركة بتعمل كذا كذا!
طب ال (posisioning) ده بيتعمل ازاي؟
عشان تعمل (براند بوزيشنينج) للمنتج/الخدمة بتاعتك،لازم الأول تعرف إيه الميزة التنافسية اللي عندك وبتميزك بين كل الشركات المنافسة ف السوق.
طب والميزة التنافسية ده بتعرفها منين!
أولا:
وانت واقف ف البلكونة ف عز المطر بتاع امبارح، بتشرب كباية السحلب،وبتفكر ف فكرة ال (startup) 😁 اللي جتلك من يومين،وانت سرحان،وواقف ف طابور العيش اللي مش عايز يخلص.
لازم تكون عارف الأول كل الشركات المنافسة ف السوق اللي بتقدم نفس الخدمة/المنتج اللي انت ناوي تقدمها.
يعني لو هتعمل شركة بتبيع (جبنة)،لازم تكون دارس كل (شركات الجبنة) اللي ف السوق.
وتعرف إيه المميزات والعيوب بتاعة كل شركة، وإيه اللي بيميز (جبنة) كل شركة عن الشركة التانية.
مثلا:
-الجودة
--السعر
--التوزيع: موجودة ف كل مكان تروحه
--كثرة الأطعمة
--جمال الطعم
--الأحجام متنوعة؛ عشان تناسب كل الناس بأسعارها المختلفة
--فيها لبن/كالسيوم أكثر
-وهكذاااااا...
وبالتالي تعرف تعمل لنفسك ميزة تنافسية ف منتجك/خدمتك تظهرك وتشهر منتجك بين كل الشركات الشريرة ده.
وتلعب عليها ف سد احتياجات ال (audience) بتوعك.😁
ملاحظة ع السريع:
الميزة التنافسية بالعربي=بلغة الفرنجة😁
Competitive advantage=
unique selling point (USP)=
diffrential advantage=
unique value proposition=
greatness point=
superiority idea.
نرجع تاني!😃
يبقا بالتالي؛عشان تعرف إيه هيا ميزتك التنافسية،
هتبدأ:
١) تعمل تحليل للمنافسين (competition analysis)
وتعرف نقاط القوة والضعف عندهم.
٢) وبعد كده تعمل (SWAT analysis) لمنتجك/خدمتك،وتقارن بينك وبين المنافسين بعد ما عرفت نقاط القوة والضعف عندهم بناءا ع ال (competition analysis) اللي انت لسه عاملها ف رقم ١.😃
ومن غير ما ارغي كتير ف الحته ده،
كنت عملت مقال (شامل) شارح كل حاجة (وبالأمثلة) ف اللينك ده:
خدلك لفه😃
https://aarafonline.blogspot.com/2020/04/SWOT-ANALYSIS.html
ماشي يا عمونا خلاص حللت للمنافسين وحللت لنفسي ف معمل المختبر بتاع الشركة😁
وعرفت إيه الميزة اللي عندي،واللي اقدر اقتحم بيها السوق وانا متطمن،واعلم بيها ع وش المنافسين ف وسط حارة البيزنس الضيقة.😂
ازاي بقا اختار كلمات مناسبة (للبوزيشنينج) بتاعي؟!
فيه عندك كذا استراتيجية:
١) انك تقول أنا أحسن من المنافس ف كذا (أسرع/أكثر خبرة/أطول فترة سداد/...إلخ).
٢)أنا بقدم جودة كذا (أحسن من المنافسين).
٣) أنا ببيع بسعر كذا (أرخص/أغلي من المنافسين).
٤) أنا بفيد المستهلك عن طريق كذا (بوفر فلوس/بوفر وقت/بوفر راحة/بوفر أمان/بوفر طاقة/بوفر شحن مجاني/ بوفر ضمان لفترة معينة/ بوفر ألوان متنوعة/..إلخ).
ويبقا كده انت عرفت الكلمات اللي ممكن تستخدمها ف عمل (الأستاذ بوزيشنينج) بناءا ع الميزة اللي عندك فعلا!😃
خد بالك بقا من الجزء اللي جاي ده كويس؛عشان هو اللي فيه البهاريز واللظاليظ.😁
انت كده عرفت الميزة،وعرفت الاستراتيجية اللي هتبني عليها الكلمات اللي هستخدمها!
ازاي بقا تحطها ف جملة أو شعار ليك ولمنتجك/خدمتك؟!
هنا بقا لازم تعمل حاجة اسمها (posisioning statement):
وده عبارة عن (جملة طويلة) شوية واللي يعرفها هما أفراد الشركة نفسها.
يعني ده حاجة داخلية ف الشركة،بين الموظفين وبعضهم+الأوفيس بوي،وعم (عبده) بتاع الكافتيريا.😁
ف ده تعتبر حاجة (internal).
وعشان تصيغ وتعمل الجملة ده هتسال نفسك كام سؤال ثعباني كده:
١) هل الجملة ده بتبين ال (compatitive adv) بتاعتي وسط المنافسين الأشرار اللي ف السوق😁؟!
٢) هل الجمله ده (related) للجمهور بتاعي وبتلبي احتياج حقيقي عندهم.
٣) هل الجملة ده سهلة ع أي حد انه يفهمها،ويعرف إيه اللي تقصده..
٤) هل الجملة ده بتوعد الجمهور بتاعك بحاجة واقعية ممكن تحصل،ولا ده مجرد جملة غير واقعية،مستوحاه من القصص اللي ف قسم ال (science fiction) الموجود ف (مكتبة الاسكندرية)،
ومتقدرش تنفذ الكلام ده ع أرض الواقع!😾
لو الإجابة بتاعة ال ٤ حاجات دول اه!
يبقا انت كده ف السليم!
ولو لا!
لازم نعيد النظر ف الجملة ده تان؛عشان هيبقا فيه حاجة مش مظبوطة!
وتحت ف المقال ده هقولك ع أمثلة لشركات عاملة (posisioning statement) صح؛وبالتالي عاملين بوزيشنينج للمنتج/الخدمة صح.
و شركات تانية الدنيا ملخبطة عندهم خالص وعاملين سمك لبن تمر هندي حرفيا!😃
وبكده بعد ما عملنا ال (Posisioning statement) بينا وبين بعض كموظفين ف الشركة الجميلة بتاعتنا ده.
نبدأ بقا ناخد من الجملة الطويلة بتاعتنا ده،
جملة تاني صغيرة تبقا شعار للمنتج/الخدمة ،واللي هنصرخ بيها ف وش الجمهور بتاعنا (بره الشركة).
يعني ده حاجة خارجية (external) وهنسميها ال (slogan/tagline).
ودول بيبقوا عبارة عن جملة (صغيرة وبسيطة) أصغر من ال (posisioning statement).
خلاصة الجزء اللي فوق ده ع السريييييع:
انت بتعمل (posisioning) للمنتج/الخدمة بتاعتك ف أذهان ال (target audience) عن طريق الميزة التنافسية بتاعك.
وبتكتب الميزة التنافسية ده ف شكل (posisioning statement) ،وبتعرف هل اختارت (statement) صح ولا لا من خلال الإجابة ع ال (٤ سؤالات) اللي قولناهم فوق!
وده حاجة (داخلية) بينك وبين الموظفين بتوع الشركة.
وبعد كده بتحط (الجملة الطويلة) شوية ده اللي اسمها ال (posisioning statement) ف شنطة، وتاخدها (مطبخ الشركة) وتحطها ف مصفاه؛عشان ينزلك (شعار صغير) اسمه ال (tagline/slogan)، واللي هيبقا شعار ليك بيقول للجمهور بتاعك ايه الميزة الجامدة اللي عندك!
تمام كده!😃
لحد دلوقتي والدنيا (beautiful) بصوت (إتش دبور)!😃
تعالي بقا نشوف شركات عملت (posisioning statement) صح؛وبالتالي عملت (slogan) لخدمتها/منتجها صح،وأظهرت فعلا الميزة التنافسية بشكل (effective)👌.
وشركات تانية عندها الدنيا مش مظبوطة!
ومش سكر!
ومش محلي!
ومش محطوط ع كريمة! 😁
-مثال ع الدنيا اللي مش مظبوطة. (slogan بايظ)!
١) شركة فودافون: ال (slogan) بتاعها هو: (اللي جاي أقوي)
لو جينا نقيم ال (slogan) ده أو أي (slogan) عموما.
لازم نجاوب الأول ع ال (٤ سؤالات) اللي اتفقنا عليهم فوق!
فاكرهم!
ومن خلال إجابتنا نقدر نحكم عليه إذا كان تمام، ولا مش أد كده!
ملاحظة: أنا عارف إن اسمها (أسءلة)، مش (سؤالات) بس عشان الكيبورد عندي مفهوش همزة ع نبرة.😁
Thank you my phone! 😁
نرجع تاني!
أول حاجة:
انت ممكن تفهم من ال (slogan) بتاع فودافون إن الشركة بتوعد المستخدمين بتقديم أقوى وأحسن العروض والخدمات ف المستقبل أكتر من أي شركة منافسة ؛عشان كلمة (اللي جي).
بس الجملة فضفاضة أوي،ومش محددة،ولا مفهوم برده هيا بتوعد المستخدمين بإيه!
هيا آه جملة قوية جدا وتحسها مؤثرة وسقفه كبيرة أوي 👏👏👏👏 لل (copywriter) اللي كتبها.
بس برده الجملة مش بتديني إشارة لحاجة!
يبقا:
١) مش بتبين الميزة التنافسية بتاعتي. ❌
٢) مش بتتماشي مع اهتمامات الجمهور ولا بتلبي احتياج عندهم. ❌
٣) مش سهلة إننا نفهم القصد ورا الجملة. ❌
٤) مش بتوعد الجمهور بأي حاجة ممكن تفيدهم ف المستقبل.
غير الوعد من الشركة لجمهورها إن اللي هتقدمهلهم ف المستقبل أحلي من اللي فات.
والجي أحسن من اللي راح،
والحي أبقى من الميت. 😕
هما قالوا اللي (جي أقوي وخلاص) وخلصت الليلة ع كده من غير أي توضيح،والمحل قفل.
يبقا الدنيا 😷👎👎👎
٢) شركة اتصالات: مستخدمين (slogan) بيقول:
(أقوي كارت ف مصر).
طب انا كده فهمت إيه!
أقوي كارت من حيث إيه!
من حيث مثلا:
إن الشركة هتديني قيمة رصيد أكتر من الرصيد الفعلي ف الكارت؟!
ولا
من حيث العروض اللي الشركة هتبعتهالي لما اشحن الكارت؟!
ولا إيه بالظبط!؟
فهنا برده:
١) مفيش ميزة تنافسية واضحة. ❌
٢) مش بتلبي احتياج عند الجمهور. ❌
٣) مش سهلة نفهم ما وراء الجملة. ❌
٤) مش بتوعد الجمهور بأي حاجة تفيدهم ف المستقبل. ❌
وبكده يركن جمب أخوه بتاع شركة فودافون😷😷👎👎
تعالي بقا ناخد مثال لشركة طبقت ال (posisioning) صح!😃
شركة أبليكس: الشركة اللي بتبيع منتج خاص بالتخسيس.
اللي إعلاناتها مليانة قنوات الأغاني،والمسلسلات، والأفلام.
المهم!
ال (slogan) بتاعهم بيقول:
(لو راجل كل)!
وبغض النظر إن كلمة (لو راجل) ده تعتبر جملة مستفزة حبتين تلاتة عشرة!
إلا إن ال (slogan) ناجح جدا.
١) قدر يبرز ال (benefits) بتاعة المنتج ببساطة.
وهو إنك عمرك ما هتتخن مهما حصل،طالما بتستخدم المنتج بتاعنا!
وتحدي كمان!
ويمكن عشان كده اضطروا يستخدموا كلمة (لو راجل)؛عشان يأكدوا ع التحدي،وقدرة المنتج إنه يحقق اللي الشركة بتوعد بيه.
٢) انه متعلق و (related) للأودينس وهما (أصحاب مرض السمنة)،اللي مش بيعرفوا يمسكوا نفسهم قصاد المحشي و (fast/junk foods) والأكل بشكل عام!😃
فهو بيقولك كل زي ما انت عايز وبرده مش هتتخن طالما دفعت تمن المنتج وبتنفعنا؛عشان ننفعك -سلم واستلم يابا-.😁
يبقا هنا:
١) الميزة التنافسية واضحة ف الإعلان.
إنك مع منتجنا مش هتضطر تبطل أكل عشان تخس.
بالعكس!
هتاكل مهما هتاكل ومش هتتخن برده.
وده الحاجة اللي بتميزنا عن أي منتج تخسيس تاني!😃
٢) بتلبي احتياج عند الجمهور.
وهو مطلب الخسسان! 😁
٣) الجملة واضحة جدا معني ومضمون.
وأي حد يقدر يفهم هما عايزين يقولوا إيه!
طب نفرض إن دماغك جابت آخرها والدنيا عملت عمايلها معاك،ومش عارف تظبط ال (slogan) ع مقاسك.
إيه الحل؟
بسيطة!
نلجأ لأقصر الطرق! أو لأسوان الطرق! (بايخه ع فكرة).😏
وهو انك تشوف ال (tagline/slogan) بتاع منافسيك،وتاخده وتروح ع الترزي وتظبطه ع مقاس منتجك/خدمتك.😃
نقول مثال:
لو ال (tagline/slogan) بتاع المنافس هو:
(أرخص شقق تمليك ف مصر) (لو شركة عقارات مثلا).
وانت بتقدم نفس الخدمة.وميزتك التنافسية هيا إنك بتقدم خدمة تقسيط الشقق لمدد أكبر بالمقارنة مع أي منافس تاني.
ممكن تقول:
(أطول مدة تقسيط شقق ف مصر/ف أم الدنيا)
وهكذااااا...
ودلوقتي الحمد لله ظبطنا ال (slogan) بتاعنا وشركتنا ماشية تمام التمام،وكله فرحان إن ال (mission) عدت بسلام،وباتمان واقف ع سطح العمارة بيسقفلنا!😄
طب تعالوا كده نجرب مع بعض نعمل (بوزيشنينج) لشركة واقعية.
ولتكن مثلا شركة (tedata سابقا) أو (we حاليا)
ممكن مثلا نقول:
(فاهمين اللي انت محتاجه/فاهمينك/فاهمين احتياجاتك/هنديك كل للي انت محتاجه...).
لو جينا بقا نوزن الجمل ده ف ميزان ال (٤ سؤالات) اللي اتكلمنا عليهم فوق.
هنلقيها مش (match) مع أي واحدة فيهم.
هيا هتبقا آه جمل قوية زي بتاعة فودافون بس مش هيبقا سلوجن طعمه حلو!
طب تعالوا نظبطه كده ونضيف عليه شوية بهارات ونزود الشطة شويتين عشان نسخن ف البرد ده!
احنا عارفين طبعا إن مشكلة الانترنت ف مصر حاجتين.
واحد
اتنين
تمام كده!😃
١) إن الباقة بتخلص قبل آخر الشهر.
٢) السرعة (so slow ).🐢
فلو الشركة (استغفر الله) يعني قررت إن الميزة التنافسية بتاعتها تكون:
سرعة انترنت للمستخدمين اكبر من أي منافس+سرعة انترنت ثابتة لآخر الشهر ومش بتقل كل لما الباقة تقرب تخلص.
ممكن ال (slogan) بتاعها يكون:
١) فاهمين اللي انت محتاجة (سرعة+سرعة+سرعة فاءقة).
٢) فاهمين اللي انت محتاجه
(سرعة+باقات تقضيك الشهر كله).
٣) باقات سريعة تقضيك الشهر كله.
٤) باقات تقضيك الشهر كله وبسرعة ثابته.
٥) باقات تقضيك الشهر كله بسرعة مش بتقل.
ملاحظة ع الماشي:
لما تيجي تختار ال (slogan/tagline) بتاعك، اعمل كذا صيغة زي اللي ف المثال بتاعنا كده؛واختار افضل واحد منهم.
طب امتا بقا ممكن تهب ف دماغنا،ونقرر نرجع نعمل (posisioning) جديد غير القديم اللي صدا ده؟
ف ( ٤ حالات من وجهة نظري ملهمش خامس تقريبا!)
١) فيه منافس ليك عمل نفس الشىء اللي انت كنت معتمد عليه كميزة تنافسية ليك،وبنيت عليه (البوزيشنينج) بتاعك.
يعني مثلا:
كنت بتقدم منتج بتقول إنه أفضل جودة وبسعر رخيص،وجه منافس جديد عمل نفس المنتج بتاعك بنفس الجودة ويمكن كمان بسعر أقل؛ف ضربك ف ال securities بتاعك.
وبالتالي هتبدأ تدور ع ميزة تنافسية تانية ف منتجك/خدمتك،وتعمل ( re-posisioning).
٢) ميكونش فيه منافس عمل زيك ولا حاجة!
بس انت طورت المنتج/الخدمة بتاعتك وسبقت كل المنافسين ف السوق،وضربت كرسي ف الكلوب،وعملت حاجة جديدة وعبقرية ف المنتج بتاعك.
زي مثلا: تكنولوجيا جديدة سهلت/سرعت/حسنت استخدام المنتج/الخدمة.
فحبيت تكون ده الميزة التنافسية الجديدة بتاعتك،واللي تميزك عن باقي منافسي السوق.
٣) أو ممكن يكون ال (behavior) بتاع جمهورك اتغير ناحية حاجة تانية،ومبقاش يهمه الميزة التنافسية اللي عندك،وشاف حاجات تانية أهم وأولي انها تكون موجودة ف المنتج/الخدمة اللي انت بتبيعهم.
ف انت عشان تواكب العصر وتركب التريند وتمشي مع الموجه بدل ما تغرق ف بحر البيزنس.
بدأت تشوف الجمهو نفسه اتفتحت ع إيه؟
وإيه الجديد اللي عايزه؟
وبدأت تطبقه ع منتجك/خدمتك.
وبكده هتضطر تعمل (re-pos) جديد.
٤) وآخر سبب: هو إن شركتك اندمجت مع شركة تانيه؛فبالتالي ممكن يبقا ليكوا ميزة تنافسية تانيه موحده غير اللي عند الشركتين قبل الدمج.
وتبقوا كيان واحد بميزة تنافسية واحدة جديدة
بعد الحروب اللي عملتوها مع بعض كشركتين منافستين،وبعد ما ربنا هداكوا،وخدتوا حبوب منع الخناقات.
وبدأتوا تمسكوا العقل وتمشوا بمبدأ البيزنس العظيم اللي بيقوا:
(If you can't beat them,join them)
والبيزنس ملهوش إلا بيت أخوه.😀
و أهو أحسن ما يبقا البيزنس بتاعنا زي بيزنس سوريا والعراق.😂
ونقدر نقول إن عملية ال (reposisioning) بتبقا مكلفة للشركات الصغيرة والمتوسطة بسبب إنها لازم تظهر ميزتها التنافسية الجديدة ف كل أنشطتها التسويقية من تاني،و تبدأ توصلها لكل ال (audience) من خلال الإعلانات،والسوشيال ميديا،والويب سايت وغيره.
إنما بالنسبة للشركات الكبيرة فميهمهاش وميشغلهاش خالص الموضوع ده؛لأنها كده كده بتعمل إعلانات كل مرة انت بتفطر فيها!
يعني بتعمل إعلانات كل يوم تقريبا!😁
وبتصرف فلوس ع الإعلانات أكتر من الفلوس اللي بتتصرف ع ميكياج (هيفا/إليسا/أنغام) مع بعض.😂
طب تعالى نشوف كام مثال لل (slogans/taglines) بتاع كام شركة عشان الموضوع يوضح أكتر.😃
١) ستار باكس:
the best coffee flavor.
the finest milk used.
وهنا ركزت (ستار باكس) ع طعم القهوة،وجودة اللبن اللي بتضيفه ع قهوتها.
وقالت إنه أحسن لبن مع أطعم قهوة لألذ زبون.😁
٢) يونيفرسال:
tomorrow's technology
وهنا الشركة بتوعد العملا بتوعها بأحدث التكنولوجيا اللي بتكون ف منتجاتها.
وإن أي تكنولوجيا جديدة هتكون من أواءل الشركات اللي بتقدمها.
٣)العربيه المرسيدس:
It's more than just a car, it's a statement
ده مش مجرد عربية،
دي تصريح!
تصريح بيكشف عن هويتك
عن حالتك الاجتماعية
عن حالتك المادية: غني بهبل أو حالة مادية متوسطة بس بيحب يتفشخر.😎
عن اصحابك: أعضاء ف نادي دبي للأغنيا😃
عن شغلانتك: مدير بنك/مدير شركة/ أو امك اللي جيبهالك.😅
عن مجتمعك: مجتمع الألترا أغنيا طبعا اللي انا وانت أكيد مش منهم.🤑
عن المنطقة اللي عايش فيها: التجمع/مدينتي/بالم هيلز/جمهورية امبابة.😁
عن شخصيتك وتصرفاتك: المفروض شخص محترم،ابن ناس،حكيم ف كلامك،رزين ف تصرفاتك.
إلا لو انت (محمد رمضان) أو (حمو بيكو) دول اسنثناء كده.
وهكذ
ااااا..!
تعالوا بقا نشوف أمثلة ع قوة (البوزيشنينج) لبعض الشركات،اللي أول ما هتشوف اسمها هتعرف هيا إيه الميزة التنافسية بتاعتها ع طول.😀
١)جوجل:
هيتبادر ف دماغك إنه أقوي محرك بحث وممكن تعرف منه أي معلومة ف الدنيا.
وبسبب قوة (البوزيشنينج) بتاع جوجل
بقت كلمة (جوجل) كلمة من كلمات اللغة الانجليزية.
(Google it)!
(ابحث عنها ف جوجل).
٢)BMW:
الفخامة،الشياكة،الغني،الوجاهة الاجتماعية،والسعر العالي.
٣)هايبر وكارفور:
التخفيضات والعروض.
_______________________________________
ف وقتنا الحالي!
التقليدي انك تشوف بوزيشنينج للبراندات والشركات.
لكن دلوقتي بقا كمان فيه (بوزيشنينج) للبني أدمين.
وبقا فيه ناس بتعمل لنفسها شهرة وصيت بإنها بتميز نفسها بحاجة معينه تكون الناس معلماها بيها؛عشان تفتح لنفسها باب الشهرة وسكة الأموال.
وخلينا نشوف أمثلة:
١)الخليل كوميدي:
اكتر حد بيقول نكت بايخة ف مجرة درب التبانه.
٢)محمد هنيدي:
أفضل ممثل كوميدي ف مصر.
٣)مرتضي منصور:
اكتر واحد بيشتم وبيسب دين ع دين أم الكوكب الازرق.😅
٤)الشيخ الشعراوي:
البساطة والهدوء ف توصيل العلم الديني._ربنا يرحمه_
٥)أبو تريكة/محمد صلاح/حازم إمام(التعلب):
افضل ٣ أنجبهم بساط الحشيش الاخضر.😍
٦)محمد عبد الرحمن:
لأ دا واحد صاحبي عادي.
بس عيل كويس والله.😄
_______________________________________
ودلوقتي أخر حاجة هنتكلم عنها هو (البوزيشنينج) بتاع الدول.
وده بتعمله كل دولة لنفسها عشان تبرز أحسن حاجة موجوده عندها عشان تجذب أنظار السياح والعالم كله ليها.
ولأغراض تانية كتيييرة.
وخلونا ندخل ف الأمثلة ع طول:
١)سوريا:
الأكل السوري الجميل (الحلو/الحادق).😋
٢)المغرب:
البهارات/فك السحر/جلب الحبيب/أكل الزبيب😁/الشيخة فاطمة/الشيخ علي المغربي...والحاجات اللذيذة ده.😁
٣)البرتغال:
كريستيانو (CR7).
٤)الأرجنتين:
ميسي ومردونا.
٥)الهند:👳♀️
اكتر دولة بتخرج مبرمجين كل سنة.
الأفلام والمسلسلات الأوفر.
٦)إيطاليا:👨🍳
المكروووونة.
٧)فرنسا:
الموضة/الشياكة/البرفانات/برج إيفيل.
٨)كوريا الشمالية:
النووي/الواد المجنون اللي عندهم (كيم جونج أون).
٩)تركيا:
أردوغان/الخلافة العثمانية/مسجد أية صوفيا.
١٠)الجزاير:
بلد المليون ونص شهيد.
هما ع فكرة (٧مليون)(معلومة تاريخية).
١١)مصر:
الهرم/النيل/الفراعنة.
وع رأي (حمزة نمرة) بيقولوا مصر هرم ونيل، وبينسوا المصري الأصيل.😄
١٢)روسيا:
القوة العسكرية/الدب القطبي/جبال الألب.
١٣)أمريكا:
أقوي دولة ف العالم/مصنع الرأسمالية/ترامب أبو شعر اصفر (حبيبي).😁😍
١٤)تشيكوسلوفاكيا:
لأ بصراحة ده مش عارف
لو تعرف انت قولي ف التعليقات.😁
وطالما انت وصلت لحد هنا
خليني أقولك ع شوية (tips) تسويقية زي ما وعدتك!😀
١) ال (brand posisioning) بتاع كوكاكولا هو (اللمة والفرحة) وبتركز ع ده ف كل إعلاناتها.
تجبلك بقا جو عيلة أو جو صحاب مع بعض وتبني عليه إعلان.(الطريقة السهلة).
٢) ال (brand posisioning) بتاع سنيكرز هو (سد جوعك) وبتعتمد ف كل أفكار إعلاناتها تقريبا ع إنها تجيب أي حاجة طبيعية وتعكسها؛عشان تثبت إنك مبتكونش ع طبيعتك أو ف مودك الطبيعي وانت جعان.
زي إنها تجيب حمار وحشي بيجري ورا ملك الغابة.
🦁🦓
٣) لازم تظهر الميزة التنافسية بتاعة المنتج بتاعك ف كل قنواتك التسويقية.
ف ( السوشيال ميديا وإعلاناتك الممولة/الإعلانات ف قنوات التليفزيون/ع الويب سايت بتاعك/إعلانات ال outdoors...إلخ).
٤) بعد ما تعمل أي إعلان ليك لازم تتأكد إنك أكدت،وأبرزت،ووضحت ميزتك التنافسية لجمهورك.
يعني كل إعلان أو حتي أي (piece of content)(POC) بتعمله لازم يكونوا ماشيين كده وف إيديهم شنطة مكتوب عليها (slogan/tagline) وجواها الميزة بتاعتك.وأي حد يقابلوه ف طريقهم يفتحوا الشنطة ويفرجوه ع اللي جواها.😁
بص يا معلم!
٥) بدل ما تقول مثلا :
أرخص فندق ف مصر!
قول:
أرخص فندق ف أم الدنيا!
الخلاصة :
خليك مختلف ف اختيارات ال (slogans) بتاعتك.ومتبقاش تقليدي.
الغير تقليدي والغير اعتيادي هو اللي بيكسب.
وهو اللي هيخلي العميل يفتكر منتجك وسط ١٧٢٨٧٣٨ منتج تاني زيك.
عقلنا دايما بيفتكر المميز مش العادي وحط تحت الكلمة ده ٣٨٨٣٧٢٨٩٢٧٨٢٨٨٢٨٢٢ خط.😀
٦)كل شركات مستحضرات التجميل/العناية بالبشرة/البرفانات/مزيل العرق/الجمعيات الخيرية وغيرهم مش بيلعبوا ف (البوزيشنينج) بتاعهم ع السعر أو الجودة أكتر ما اللعب كله بيبقا ف حارة المشاعر والإيموشنز؛
لأنهم عايزين يقنعوا الجمهور إن مع استخدام منتجاتهم هيبقوا:
بشكل أحسن
أجمل
جذاب أكتر
ب بشرة منورة
ب بشرة أفتح
ب دون حبوب
ب دون تجاعيد
ولا هالات سودة
وشعر أنعم
وأطول من برج القاهرة
وكمان أكتر صحة وبيلعب حديد ف جولدز جيم!😁
وهكذاااا...
وبكده يبقا مقال الإسبوع خلص!
وأشوفكوا ف مقال تاني
ومتنساش زي ما اتعودنا نعمل شير عشان يوصل لكل واحد بيتعلم تسويق وليك طبعا الأجر والثواب كله.😍😍
دمتم مبدعين!
و
سلاموا عليكوا!😁
 قريته ف أي حته قبل كده! بس لا! لإنك بعد قراية المقال ده …){kind=link}
تعليقات
إرسال تعليق
شكرا لك علي التعليق